തിരുവനന്തപുരം: നട തുറന്നിരിക്കെ ക്ഷേത്രത്തില് കയറി പൂജാരിയെ ബലമായി കസ്റ്റഡിയിലെടുത്തതായി പരാതി. മണക്കാട് മുത്തുമാരി അമ്മന് ക്ഷേത്രത്തിലെ പൂജാരി അരുണിനെയാണ് പൂന്തുറ പോലിസ് കസ്റ്റഡിയില് എടുത്തത്. പൂജാരിയെ കസ്റ്റഡിയിലെടുത്തതിൽ വീഴ്ച സംഭവിച്ചിട്ടുണ്ടോ എന്ന് അന്വേഷിച്ച് റിപ്പോർട്ട് സമർപ്പിക്കാൻ ഫോർട്ട് എസിപിക്ക് നിർദ്ദേശം നൽകി.
ഇന്നലെ വൈകിട്ട് 5.45ഓടെയാണ് അരുണ് പോറ്റിയെ പൂന്തുറ പൊലീസ് സംഘം കസ്റ്റഡിയില് എടുത്തത്. ജൂണ് 25ന് പൂന്തുറ ദേവീ ക്ഷേത്രത്തില് നടന്ന പഞ്ചലോഹവിഗ്രഹ കവര്ച്ചയുമായി ബന്ധപ്പെട്ടായിരുന്നു പൊലീസ് നടപടി. മുന്പ് അരുണ് ഈ ക്ഷേത്രത്തില് ശാന്തിക്കാരനായിരുന്നു.
ക്ഷേത്ര ഭാരവാഹികള് ഉയര്ന്ന ഉദ്യോഗസ്ഥരെ വിവരം അറിയിച്ചതിനെ തുടര്ന്ന് എട്ടു മണിയോടെ അരുണിനെ പൊലീസ് തന്നെ തിരികെ കൊണ്ടു വിട്ടു. പലതവണ ഫോണ് വിളിച്ചിട്ടും എടുക്കാത്തതിനാലാണ് കസ്റ്റഡിയില് എടുത്തതെന്നാണ് പൂന്തുറ പൊലീസിന്റെ വിശദീകരണം. ക്ഷേത്രം തുറന്നിരിക്കെ പൂജാരിയെ ബലമായി കസ്റ്റഡിയില് എടുത്തതിനെതിരെ മുത്തുമാരി അമ്മന് ക്ഷേത്ര ഭാരവാഹികള് ഫോര്ട്ട് അസിസ്റ്റന്റ് കമ്മീഷണര്ക്ക് പരാതി നല്കി.
